انا عارف قد ايه الموضوع بيكون ممل انك تقعد تقرا مقاله طويله عريضه وفي الاخر تلاقي انه الحاجات المفيده اللي فيها متعديش ربعها. علشان كده انا دايما زي كل مقاله اوعدك اني هاشاركك معلومات مفيده من اول حرف لاخر حرف. ان شاء الله المقاله دي هتشرحلك تبص على ايه وانت هتشتري اداة لتحليل والاستماع للمحتويات الاونلاين. بسم الله نبدا.
في البداية خلينا متفقين انه في معاير تقنيه وفي معاير تنظيميه. مثلا تقنياً:
- انت محتاج اداة بتراقب جروبات الفيسبوك.
- وتنظيمياً محتاج انه يكون في عدد 10 مستخدمين
- او عدد يكون فيه خدمات مختلفة.
- او يكون تكلفة الاداة متزدش عن مبلغ معين.
خلينا متفقين برضه انه مفيش اداة واحده في العالم هتغنيك عن كل الخدمات. مفيش اداة بتعمل كل حاجه. لازم تركز انت عايز ايه.
وفي المقالة دي انا هاركز معاك فقط على اي اداة للاستماع والتحليل للبيانات اونلاين. طيب هو فيه ايه غير كده؟ في حاجات كتيره. في ادوات للإدارة Social Media Management وفي للتسويق وفي لخدمة العملاء وفي حاجات كتيره.
هنركز على مراقبة وتحليل المحتويات. وكل ما رغباتك زادت، الأداة هتتغير. يعني لو عايز بس تجمع المحتويات، ده مختلف عن انك تجمع وتعد، مختلف عن انك تجمع وتعد وتحلل اوتوماتيكي. تعالوا نشوف كده ايه المعايير الأساسية اللي انصحك بيها.
تفتكر ايه المعايير الأساسية اللي انصحك بيها
كمل قراية وانتا هتعرف ايه النصائح اللي بتكلم عنها
هي البيانات بتيجي منين؟
معظم الأدوات بتفتي. ايوه بتفتي ومش بيقولوا الصدق. يقعد يقلك احنا بنراقب كل المواقع الاخباريه وكل المدونات وبنراقب شبكات التواصل زي فيسبوك وانستجرام و اي كلام. طيب ليه ده كله اي كلام؟ علشان هو هدفه بس انك تيجي توقع عقد سنه او اكثر وبعدين يتعاملوا معاك.
طيب ليه المشكله دي؟
ركز معايا.
اي تعامل بين الأدوات واي مصدر للمعلومات اونلاين بيكون مبني على API ودي البوابة اللي بتسمح بتبادل المعلومات. في بعض الشبكات مقفوله اصلا عندها البوابه دي زي سنابشات مثلا.
وبعضهم بيسمح بشوية معلومات زي Linkedin اللي بيسمحلك بس انك تشوف بيانات الصفحة بتاعتك انت فقط وبيانات محدده جدا. وبعضهم فاتحها على البحري زي تويتر.
لازم تقرر ايه هي المنصات اللي عايز تراقبها كويس. لو الفيسبوك هو اهم منصه فلازم تتاكد انه الأداة عندها قاعدة بيانات ضخمه ومجموعة Tokens تكفيهم انه يعملوا ريكويست لكل حاجه انت بتدور عليها. يعني ايه الكلام ده؟
التوكين دي اعتبرها كده زي الفلوس اللي الأداة بتدفعها للمنصة علشان تاخد معلومات. عارف لما بتيجي في اي ابليكاشن ويقلك Allow us to use your details on Facebook? او اي منصة تانيه؟ لما بتدخل بياخد توكن باسمك. كل مره بيروح يجيب معلومات بيستخدم توكن. فلو انت بتدور جوا الفيسبوك. مهم جدا تعرف اذا عندهم داتا بيز من الصفح لانه مفيش حاجه اسمها يدور في كل الفيسبوك وحجم الداتابيز بتاعتهم قد ايه.
المصادر اللي بيجيبوا منها دي مهمة جدا وقدرتك انك تضيف اليها.
يتطلب وجود أداة لديها القدرة على تحليل الجمل، وليس مجرد الكلمات.
شركات كتيره هنا بتكسل انها تبني بنفسها الذكاء الإصطناعي فبيستعملوا IBM Watson. لكن علشان تتاكد لازم تختار موضوع مهم بالنسبة ليك وبعدين خد Representative Sample محدش عدل عليها قيس بيها.
المعايير المهمة لما تيجي تشتري اي أداة لتحليل ومراقبة البيانات على الانترنت؟
لازم تاخد بالك
ايه هي المصادر اللي بتيجي منها البيانات؟
تعامل الأدوات ومصادر المعلومات عبر الإنترنت يعتمد عادةً على وجود واجهة برمجة التطبيقات (API)، وهي البوابة التي تمكن من تبادل المعلومات. هناك بعض الشبكات التي تحظر وصول البوابة هذه، مثل سنابشات على سبيل المثال.
وهناك بعض المواقع التي تسمح بالوصول إلى معلومات محدودة فقط، مثل لينكدإن الذي يسمح لك بعرض بيانات صفحتك الشخصية وبعض البيانات المحددة جدًا. وهناك بعض المواقع التي تفتح بوابتها بشكل كامل، مثل تويتر.
ايه قدرتهم على تحليل العربي؟
هنا بقى معظم الأدوات عندها فجوة رهيبه جدا! الأداة اللي انا اثق في قدرتها على تحليل العربي بقوة كبيره جدا هي Crowd Analyzer في مشكلة كبيره لان معظم الأدوات بيقلك احنا بنعمل تحليل للعربي. لكن تيجي تبص على تحليل المشاعر مثلا او تحليل النوع تلاقيها في عالم تاني.
مثال:
انا نور وصحابي بيقولوا اني موهوبة جدا في الرسم. الأداة الكويسه هتطلع دي انها جي من بنت مش ولد. علشان كلمة موهوبة مش موهوب. ده بيحتاج انه الأداة يكون ليها قدرة باستخدام الذكاء الإصطناعي انها تحلل الجمل مش مجرد كلمات. طبعا نفس الكلام على المشاعر. انا فرحان جدا بالسعودية. دي ايجابي لكن انا فرحان من السعودية. محايد لانه ده اسمه.
استخراج المعلومات من الأداة
دي نقطة مهمة جدا وتشمل العديد من النقاط الفرعية.
على سبيل المثال هل تقدر انك تستخرج اي معلومات انت شايفها قدامك بال Metadata بتاعتها في اكسل او CSV.
طبعا ده هيسهل عليك جدا التعامل والتحليل او لو عايز تاخد البيانات وتلعب بيها لو مش عندك اي اكسس على API بتاع التول علشان توصلها ب PowerBi مثلا. كمان هل تقدر تاخد الملعلومات دي بصورة دورية زيAlert او Digest وايه انواع الدايجست.
ولو تقدر تاخد المعلومات في اكسل فايه هو اكبر حجم للبيانات 20 الف ريكورد ولا 50 الف ولو اكثر هتعمل ايه؟
الأداة القوية تقدر تديلك طرق كثيره علشان تعرف تستخرج المعلومات منها Raw Data علشان تعرف تلعب بيها.
التحليلات المتقدمه في الأداة
سيبك من المعلومات والاحصائيات الرئيسية زي اني اعد ليك في كام مره حد اتكلم عنك. في احصائيات وتحليلات بتكون متقدمة جدا تحتاج ساعتها Advanced AI علشان يطلعها.
مثلا احد الأدوات بتقدر تتابع اي خبر وازاي الخبر اتحرك جوا الانترنت. يعني مثلا الخبر كان الساعة 3 الفجر على الموقع الفلاني. الساعه 4 وربع راح على تويتر ومنه انتشر جدا وراح على لينكدان الساعه 9 الصبح بسبب الشخص الفلاني.
ده مثال على رسم اسمه Virality Map وفيه امثلة كثيره جدا زي كده. حاجات بره الصندوق بتكون فعلا Social Intelligence مش مجرد Social Listening.
الفلترة والترتيب
طبعا لما بتعرض البيانات لازم تتاكد انه بتعرض البيانات المناسبة ليك ولو فعلا عايز تعمل Actionable Insights يبقى انت محتاج تعمل Slice and Dice في البيانات كثير لغايه ما توصل للمعلومة المهمة فعلا. لكن للاسف مش كل الأدوات بيكون عندها قدرة بسيطه وسهله انه تغير وتعمل ترتيب وفلترة.
مثلا احد ادوات الاستماع العالمية معندهمش القدرة انك تعمل فلتر بالمحتويات الفيديو بس او الصور بس. لازم علشان تعمل كده تكون عارف الكود اللي هتستخدمه في Boolean Query بتاعك وده صعب انك تكون فاكره. وهكذا.
تحليل الحسابات وليس المحتويات
معظم الأدوات وحتى العالمية منها بيكون عندهم بس تحليل للمحتويات اللي بتحصل على الانترنت.
طيب لو انت عندك حسابات معينه وعايز تعرف تفاصيلها زي مثلا التطور في عدد المتابعين او تحليل المتابعين نفسهم، ساعتها لازم تستخدم غالبا يا اما اداة تانيه اصلا او تدفع Add-ons علشان تقدر تاخد معلومات عن الحسابات والمتابعين اللي عندها. فانت لو الموضوع مهم بالنسبة ليك. انصحك تسال عليه في الاول.
تحليل مقارنه ما بين اكثر من استماع
دلوقتي ده مثال تاني لازم تفكر فيه وانت بتشتري الأداة. Social Bakers مثلا عنده طريقتين تقدر انك تحلل اكثر من حساب مع بعض. يعني مثلا تقدر تعمل Dashboard وتجمع فيها حسابات او تحلل ما بينها. وكمان تقدر تعمل Analytics Benchmark وتعمل مقارنه مباشره ما بين الحسابات.
هل في طريقة انك تعمل ده كمان على المحتويات اللي بتستمع اليها؟ يعني عايز تعمل مثلا مقارنة ما بين الناس اللي بتتكلم عن فودافون ضد الناس اللي بتتكلم عن اورانج بس مش تعمل فودافون الاول وتخرج تسجل الارقام وبعدين تعمل اورانج وتسجل الارقام وبعدين تقارن. انت عايز الأدة تعمل الاستماع والمقارنه في نفس الوقت.
حجم الكلمات المفتاحية المستخدمة في المراقبة
خلي بالك انه في ادوات كثيره جدا بتسمح ليك ب 1024 Charecters بس في الكويري اللي بتدخلها. فلو انت بتدخل كويري حجمها كبير. مثلا 10 الاف واكثر، يبقى لازم تسال على اقصى حجم للداتا مسموح في الكويري.
التحكم في الفريق
دي تبان حاجه بسيطه لكنها في غايه الأهمية. لكن القدرة انك تمنع اي شخص انه يعمل اي تعديل على كويري انت عملتها او انه بس يعمل تعديل على حاجات محددة مش كل حاجه بيكون موضوع مهم جدا!
انا في رايي في حاجات اساسية لاي اداة والاهم انه يكون عندك القدرة على توزيع المهام دي حسب العميل.
- ادمن: بيكون عنده القدرة يعمل كل حاجه ويغير في درجات الأشخاص.
- محرر: وده بيكون عنده القدرة انه يعمل كل حاجه ما عدا انه يمسح او يضيف ناس او يغير من قدراتهم.
- زائر: ده بيكون عنده القدرة انه يشوف بس لكن مش يقدر يغير اي حاجه.
خدمة العملاء
-الأداة وقعت؟
-في تعديل؟
-في طلب لخدمات جديده؟
لو مفيش خدمة عملاء كويسه وحد متوفر معاك اعرف انك هتحتاس كثير جدا! غالبا كل الأدوات بيوفر ليك حد متخصص ليك بعد رقم معين بتدفعه.
الأداة وقعت
في تعديل
في طلب لخدمات جديده
السعر
وبالنسبة لي ده اخر حاجه قصاد كل اللي هتاخده فوق وكفاءة الأداة تقدر تحدد على السعر اللي بيطلبوه مبالغ فيه ولا منطقي.
خلاصة المعايير المهمة
في حاجات كثيره تقنيه جدا مذكرتهاش هنا زي انك تبقى عارف الأداة في كل مره بتروح تعمل Call على المعلومات في الشبكات ولا بتجيبها مره واحده وتخزنها عندها في السيرفرات بتاعتها وغيره. الأداة تقدر ترجع لورا في الوقت مجانا قد ايه؟ على انهي قناة؟ المهم عندي دلوقتي انك تدرك متطلباتك كويس قبل لما تقرر انك تروح تشتري اي اداة وافهم اللي بيتقال ليك مش تاخد الكلام السطحي وتعتمده.
اتمنى للجميع التوفيق.
