من حوالي 8 سنين وانا بحاول اني اعرض قصص من البيانات . اقرا اللي موجود في الداتا على الانترنت او على اكسل شيت وبعديها اقعد افكر.
ازاي اقدر اني اشارك المعلومات دي مع المستفيدين من التقرير؟ هل يا ترى احسن طريقة اني اكتبها كلها ولا اعرضها في شكل رسم بياني احسن؟ ولو هاكتبها اكتب ايه؟ ولو هارسمها اعملها ازاي؟ لغايه دلوقتي انا غالبا عملت ما لا يقل عن 50 نوع مختلف من الرسومات البيانيه غير الانواع المشهورة علشان اوصل المعلومة بصورة سهله. في قاعده ذهبية اعتقد انها هتفيدك جدا:
الرسم البياني هو توضيح للمعلومة ويتم توظيفة حسب المعلومة. اوعى انك تعمل العكس توظف المعلومة حسب الرسم البياني المتاح عندك
الرسم البياني هو توضيح للمعلومة ويتم توظيفة حسب المعلومة. اوعى انك تعمل العكس توظف المعلومة حسب الرسم البياني المتاح عندك
انا ممكن اعرض الفكرة من غير أي رسمه أصلا
نفترض انك بعد ما قارنت او حللت الأرقام الي عندك لقيت انك عايز توضح رقم واحد بس. وليكن مثلا متوسط كفاءة الموظفين اللي بيتشغلوا من البيت ضد اللي بيتشغلوا من المكتب. وانت في قصتك عايز توضح قد ايه اللي بيتشغلوا من البيت ممتازين وانهم مش بيضيعوا وقتهم.
الوقت ده لما يكون عندك رقم أو رقمين، يمكن أن يكون النص البسيط هو احسن حل لتوصيل فكرتك. هاوريكم ازاي في أي محتوى قادم انت تكتبه أزاي تلفت الانتباه للكلام والأرقام. مثلا:
انا عارف انك حابب تقارن بين الرقمين لكن فعلا مش محتاجه كل ده. انت بكل بساطه كان ممكن تقول:
افتكر انك عايز توضح نجاح او فشل تجربة الشغل من البيت مش انك تقارن وتعرض المنافسة بينهم وبين اللي اشتغلوا من المكتب. ولا انك توضح الفرق بين 2018 و 2019.
ايه هدفك من القصة؟ ايه اللي عايز تقوله؟ أوقات كتيره عرض معلومات اقل بتركز فيها على لب القصة احسن من سرد معلومات كتيره جدا، حتى لو مفيده. ومن هنا بيجي مصطلح اسمه متلازمة الحمل الزائدك للمعلومات و الحمل المعرفي. الأول هي انك تضطر انك تتخلى عن معلومات قديمه علشان تقدر تكتسب معلومات جديده انت شايف انها اهم.
والثاني انك بتحمل عبىء على نفسك بالبلدي راسك بتسخن علشان تستوعب المعلومات الجديده لانها كتيره. وبيجي هنا الد اعدائك اثناء كتابة التقارير او شرح البيانات وتحويلها لمعلومات، الد اعدائك هو السرد! يعني الرغي الكتير والبعد عن الهدف الرئيسي لقصة البيانات.
انت حاليا شغال فنان، مخرج، سارد قصصي، مصمم معلوماتي، سمي نفسك اللي تحبه.. لكن هدفك الأساسي هو تحويل البيانات لمعلومات بطريقة سهله الناس تفهمها من غير ما تستهلك كمية كبيره من طاقة عقلها.
كل ما يوجد في عرضك للمعلومات ولا ينقص من المعنى الرئيسي للقصة شيء يمكنك الاستغناء عنه
شيل أي كلام او رسومات او توضيحات انت حاس انها مش هتؤثر في المعنى الريسي للقصة لا سلبي او إيجابي. كل ما سهل وضع المعلومة، كان عرضك احسن بكتير. في مباديء في التصميمات وطرق العرض اسمها Gestalt مشهورين جدا واعقتد انك بتستخدمهم من غير ما تاخد بالك. الفيديو ده بيشرح مجموعة من الطرق اللي بيها بتساعد على تنظيم محتوياتك وعرضها بطريقة واضحه من غير أي فوضى او معلومات زيادة.
على سبيل المثال لو اخدنا نقطة ال Continuity اللي بتوضح انه التواصل بين المجموعات وبعضها بيخلي اللي بيشوف او بيقرا يحس بالارتباط. يعني ايه الكلام ده؟ ناخد المثال ده:
الرسمة على الشمال بتوضح تماما انهي ايام قوية وانهي وحشة. الهدف من الرسمة واضح. لكن لو طبقنا مبدأ الاستمرارية Continuity هانلاقي الرسمة على اليمين بتوضح مش بس انهي يوم افضل، لكن كمان التحول الايجابي او السلبي بين الايام. طبعا لو رسمت او وضحت بيانات باستخدام الاستمرارية في وقت مفيش علاقه بين النقاط، ساعتها هتكون بتوصل معلومات بطريقة خطا.
علشان كده مباديء Gestalt مفيدة جدا اثناء عرضك للبيانات بصورة بسيطه. في مشاكل كثير ممكن تقابلها وانت بتعرض البيانات تبوظ المعلومات تماما. مثلا لو انت متابع على اللينكد ان في صورة شهيره جدا بقالها فتره بتاعت ترتيب العقل في قراءة المعلومات على الصورة.
الفكرة بسيطة جدا. انت عقلك بيوصل كل ما هو منطقي ليك وبيساعدك انك تاخد القرار بسرعه. احيانا حتى لو خطا بس هو بيكون منطقي. قراية اللي مكتوب كانت منطقية جدا. علشان كده احد الاخطاء اللي بنعملها وانت بترجم البيانات لرسومات هي عدم وجود اي تناسق في العرض. يعني ايه؟ تعال نشوف:
في الحقيقة ، الرسمة اللي فوق دي بشعه. صحيح انها فيها اساسيات توضيح الارقام يعني كل فرع موجود و مترتبه. لكن توضيح المعلومات فيها سيء جدا! واضح جدا ايه هي النقاط اللي انا عايز اقولها لكن طريقة عرضها سيئة جدا. اولا الكلام غير متناسق مع بعضه وده اسمه Alignment ومهم جدا زي ما وضحنا في Gestalt علشان بيوحي للمتلقي فهم معين.
ثاني نقطة هي توزيع المساحات البيضاء في التقرير. لازم تكون مريحه للعين بطريقه مش تتعب اللي بيقرا. احد افضل الطرق هي السيميتريه. يعني بتوزعها حوالين المعروض بنفس الكمية والطريقة. في مقاله اكادمية رهيبه جدا في عالم Human Computer Interactions بتقارن ما بين جهازين ATM. واحد شكله جميله جدا وفيه مميزات محدده. الثاني شكله بشع، لكن فيه نفس المميزات بالظبط. بعد ما الناس استخدمت الجهازين قالوا انه الجميل فيه مميزات اكتر. ومن هنا طلع مصطح.
What looks beautiful is perceived useful - كل ما يبدو عليه الجمال يعتقد انه مفيد
لو بصيت على الرسمة اللي فوق خطا تالت فيها انه احنا موزعين نفس الاهمية لكل الفروع لكن هما 3 فروع بس اللي فيهم فعلا القصة الحقيقية. وده اسمه توزيع الالوان. تعال مثلا ناخد نفس الرسمة بس المرة دي نعرضها بطريقة افضل.
:تعال طيب ناخد مثال تاني لرسمه وحشة ونحاول نخليها اجمل ونقول عملنا فيها ايه
انا اعرف ناس كتير بيعتبروا الرسمة دي ناجحه جدا في عرض الاهداف المطلوبه منها. بتوضح التحرك في المبيعات على مدار السنة وكمان بتوضح ان فرع ت بعد التعديلات اللي حصلت في شهر ما بدأ انه يجيب مبيعات اعلى من فرع ج. للمره التانيه ده رسم بشع وتوضيح سيء جدا بالنسبة ليا. تعال اوريك ممكن نعمل ايه في وازاي نحول الرسمة دي لكده:
احنا عملنا ايه بقى؟
- شلنا حدود الصورة.
- عدلنا الارقام العشرية في المستوى Y Axis.
- شلنا الارقام المتشابه قبل شهر اغسطس.
- شلنا ال Legend وحطيناها جنبها.
- شلنا الخطوط الطولية والعرضية Grid lines.
- وحدنا شكل ال Marker ل دايره.
التغيرات البسيطه دي هتخلي الرسمة مريحة للعين اكثر وهتركز على النقاط اللي انت حابب تقولها عن طريق انها قللت من مرض عدم وجود تناسق في العرض اللي وضحته قبل كده.
في بداية المحتوى وضحت اني هاقلك ازاي تختار وتحسن من طرق عرضك للبيانات. اتمنى تكون وجدت المحتوى ده مفيد حتى الآن. اقرا الجزء عن اختيار طرق اخرى ورسومات اخرى لعرض المحتويات زي الجداول – Heatmaps – Line Chart – Pie Chart – وغيرها من الرسومات المشهورة نسبيا.