محمد الشريف

باحث ومحلل لبيانات مواقع الاعلام الاجتماعي

الأختيار الأصح لطرق عرض البيانات 2

عرض البيانات

من الافضل ليك ان تنتهي من قراءة الجزء الاول قبل ان تبدأ في الجزء الثاني الخاص بطرق عرض البيانات. زي ما وضحت. الرسومات البيانية كتيره جدا. الفكرة في قدرتك على انك توضح ده بطريقة سهله وبسيطه توفر عليك سطور كثيره جدا من الشرح. الرسم ممكن يكون عالمي يساعدك او كارثي يخلي اللي بيقرا ياخد قرارات غلط. خلينا نبدا

لتاني مره: مش لازم رسم بياني – ممكن جدول!

زي ما وضحت ليك في الجزء الاول، مش لازم كل حاجه رسم بياني. ممكن شوية كلام يوفر عليك شرح الرسمة. ممكن كمان جدول يكون اوض بكتير جدا من الرسومات. بس خلي بالك انه الجداول الكبيره سيئة جدا في العرض. هنا انت لازم تختار جدول اه بس ميكنش كبير لدرجه انه يكون صعب عليا اخد معلومات منه. بص على الشكل التالي ازاي تخلي شكل الجدول جميل في خطوات بسيطه:

حاجه تانيه زي الجداول بس ممكن نلعب فيها بالاكسل هيا Heatmaps تعال نشوف شكلها عامل ازاي:

Heatmaps

تعال نبص على الصورتين اللي تحت. هي هي نفس البيانات لكن بسهولة شديدة تقدر من الHeatmap تطلع انهي احسن من غير ما تبذل مجهود. عقلك البشري بيفترض انه اللون كل ما فتح معناها انه الرقم بيختفي ولكن كل ما كان اللون واضح وثقيل كل ما معناها انه اهم.

على طول عينك هتروح على اعلى الشمال فرع أ Q1 و فرع ج لانهم وبخاصية الهيتماب الاسهل للقرائة. الطريقة دي في عرض البيانات ظريفه وسهله. محتاجه بس يكون عندك قصه سليمه تتناسب مع سهولة العرض والا هتلخبط اللي بيتفرج لانه مش فاهم انت عايز ايه.

المحبب الى قلبي Scatterplot

الرسمة ده سهله جدا ومنها تقدر تحدد العلاقه بين رقمين او ثلاثه لو هتستخدم ال Bubble size. الفكرة في تحديد الارقام على X Axis و ال Y Axis بصورة بسيطه تخلي اللي بيقرأ فاهم انت عايز تقول ايه. تعال زي كل رسمه هاوريلك ازاي ممكن تخلي شكلها احسن:

الفكرة انه في الرسمة الاولى على الشمال احنا موزعين كل الفروع وعدد موظفين المبيعات اللي عندها. تخيلنا انه كل ما زاد الموظفين كل ما المبيعات زادت. لكن في المثال بتاعنا لقينا انه لأ مفيش علاقه سببيه ما بينهم. طيب انا عملت ايه علشان احسن الرسمه؟

  • شلت كل الزيادات اللي مش هاتفدني في قصتي.
  • زودت المتوسط ما بين المبيعات وما بين اعداد الموظفين

كده بقى عندي نقطه هيا المتوسط بس لسه برضه عايز اسهل الرسمة اكتر.

بالطريقة دي انا وضحتت اليه فين القصة بتاعتي. ال 4 فروع اللي موجودين دول هما القصة بتاعتي في حاجه صح وحاجه غلك بتحصل فيهم. ومن هنا ممكن ابدا اشرح بصورة افضل اهداف البحث بتاعتي.

التغير الزمني عن طريق Lines

والرسم ده يعتبر من اشهر الانواع لما تحب توضح التغير عبر الزمن. ممكن تستخدمه ل عنصر واحد او اكتر من عنصر حسب احتياجك. لكن الفكرة اللي دايما بينشتغل عليها هيا انك تستغل فقط اللي انت عايزه. زي ما وضحت اليك في الجزء الاول احنا ممكن نعرض رسومات كتيره بطرق مختلفة لو استخدمنا Line Chart علشان نوضح التتغير مع الوقت. مثلا:

ودايما احد الحلول الظريفة هو انك توضح المتوسط لو تقدر في الرسمة زي ما عملنا في Scatter Plot لو انت حابب توضح ارقام محدده. طبعا انا احب افكرك ان المتوسط ممكن يكون هو الاهم، اقراالبوست التالي عن خطورة المتوسط:

قبل الفطار و تكملة للشرح البسيط جدا عن بعض المسميات الاحصائية المهمة للجميع.الانحراف المعياري – Standard Deviation بكل…

Geplaatst door ‎Mohamed Elsherif – محمد الشريف‎ op Vrijdag 24 mei 2019

لكن انا بس عايز تفهم انه مش لازم تستقر بس على اللي موجود عندك. ممكن تزود انت علاشن تبسط او تشرح معلومات اكتر في الرسمة ولازم تكون عارف انهي رسمه مثاليه في انهي وقت.

الاعمدة الرأسية

ممكن نعتبر النوع ده من الرسم من اشهر الانواع استخداما في التاريخ! سهل جدا ومعبر بس لسه ممكن الناس تغلط فيه. احنا بطبيعتنا لما بنشوف الرسمة دي بنقيس على طول قمة العمود باللي جنبيه. تعال ناخد المثال ده:

الرسمة اللي على اليمين والشمال هما نفس الأرقام لكن الشمال بدأنا فيها العد من 96 وده مخليك تحس انه الفرق بينها وبين فرع أ ضخم جدا! لكن الفرق هو هو زي اليمين. احد اكبر الغلطات انك لما تعمل الجدول بتسيب Excel Defaults زي ما هي. اوعى تبدا في الرسمة دي برقم غير 0. ده هيغير فكرة الرسمة والنتيجه اللي انت عايزها تماما! طيب انا عملت ايه في الرسمة؟

  • نقلت الارقام بتاعت Y Axis لليمين. احنا بطبيعتنا بنقرا الرسمة من الشمال لليمين. فاول حاجه بتيجي عليها هي واحدات القياس قبل ما تشوف البيانات نفسها. لكن لما بنقلها لليمين. انت بتشوف البيانات الاول بعديها وحدات القياس.
  • انا سبت المقياس من 0 ل 120 على اليمين علشان بس اوضحلك انك تبدأ من الصفر. لكن انا ممكن كنت اشيله واحط الرقم جوا او فوق كل عمود.
  • حجم العمود. اتاكد انه مش صغير قوي زي الرسمة اللي فوق ولا كبير قوي انهم يكونوا لازقين في بعض. انا بحب استخدم دايما Gap Width يكون 60% لان ده بيخي غالبا منظرها حلو. علشان تاخد قاعده، خلي المسافة بين العمودين تعادل نص حجم العمود تقريبا.

انا كده خلصت الجزء الثاني. اتمنى تكون استدفتم وتكون طريقة شرحي ممتعه وبسيطه ليكم. ان شاء الله الجزء القادم هاتكلم عن العديد لسه من الرسومات زي 3D و Stacked Charts وغيرها من النقاط الممتعه والمهم لكل شخص بيعرض ويخلص بيانات. اتمنى لكم السعاده دائما وابدا.


محمد الشريف

انا محب للناس واتمنى ان نجد الارض مليئة بالخير والمحبة بين مخلوقات الله دائما وابدا. انا شخصية تستمد قوتها من الاشخاص واقدم دائما الافضل وانا اعمل معهم. احب متابعة الانيميشن الياباني وكل ما يتعلق ايضا بسرد القصص من البيانات. احب القدرة على توصيل المعلومات الصعبة بكل سهولة للجميع. احاول زيادة المحتوى العربي القيم ولست متخصص في اللغه العربية. لذلك اتمنى ان تجد ما اقدمه مفيدا لك في حياتك المهنية والعامة.