محمد الشريف

باحث ومحلل لبيانات مواقع الاعلام الاجتماعي
كتابة التقارير لقسم العلاقات العامة

ازاي اكتب تقرير علاقات عامة من بيانات الانترنت

تقارير

اهلا وسهلا بيك صديقي العزيز في مدونتي اللي بكتب فيها مواضيع علشان اقدر اساعد. النهارده الموضوع عن كتابة تقارير العلاقات العامة من نتيجة مراقبة وتحليل المحتويات على الانترنت.

بداية يعني ايه علاقات عامة؟

انت شخص وظيفتك هي التاكد من جمالية صورة الشركة دائما. لازم تبقى متاكد انه نظرة المجتمع ليكم إيجابية وان سمعتهم حلوة. معظم الوقت بترد لو فيه حملات سلبيه بصورة منمقه وجميله تتناسب مع جمهورك، بتشرح سياسات الشركة العامة، وبيكون ليك دور مهم جدا في بناء العلاقة مع الجمهور.

طيب انا تواصلت مع مؤثرين علشان ننشر تعليقات الشركة او عملت PR RELEASE ومحتاج اعرف واقيس مدى نجاحه. ساعتها انت هتبدأ تكتب تقرير. خليني اساعدك هنا بقى.

اولا تحديد المدة الزمنية

انك تعمل تقرير يومي، غير اسبوعي، غير شهري، غير ربع سنوي، غير سنوي. انك تعمل تقرير لمدير في الشغل، غير الموظف الغلبان اللي المفروض انه يقرا 100+ صفحة، غير رئيس الشركة اللي عايز يعرف الخلاصة والنهاية. طيب ايه اللي هيفرق؟

  • حجم التقرير وده يشمل عدد الصفحات.
  • نوع المعلومات.
  • حجم المعلومات وده يشمل عمق المعلومة.
  • طريقة العرض.

تعال افهمك واحده واحده لو انت مش فاهم قصدي ايه.

لما تبعت تقرير يومي، لازم تبقى فاهم اللي هيقراه ده عايز ايه. بكل بساطه في ناس بتحتاج التقارير Archive مش اكثر. يعني هو فعليا مش هيقرا التقارير بس هيرجعلها لما يحتاجها. ساعتها ممكن تلاقي نفسك بتعمل تقرير 100 صفحة مثلا يوميا. لانه بيحتاج مثلا يعرف كل الناس اللي علقت على خبر معين او كل الجرايد والمجلات اللي كتبت عن شخصية معينه. #يا_مسكين 🙁

وممكن تبقى مع كلاينت ابن حلال مهتم فعلا ان يبقى عنده تقرير تفاعلي يقدر ياخد بيه قرارات سريعه. لكن هنا انت وخظك لانه ممكن يكون سريع جدا لدرجة مثلا انه عايز تقرير يومي الساعة 10 الصبح بيغطي من 8 الصبح امبارح لحد 8 الصبح النهارده. ساعتها انت قدامك ساعتين بس تعمل فيهم التقرير.

لازم تكون فاهم احتياجات العميل فعلا وخاصة هو عايز تقرير مدته ايه وعايزه امتى ومين اللي هيقراه وايه هدفه الحقيقي منه لانه ده هيساعدك تعرف حجم التقرير، حجم المعلومات، نوع المعلومات، وطريقة العرض المناسبه ليه.

خلي بالك طبعا في تقارير الأزمات لانها بتكون عرضية ملهاش وقت. الافضل تكون مجهز Template ويكون موافق عليها العميل علشان لو قدر الله وحصل حاجه تقدر تتحرك بسرعه شديده وتسلم تقرير سريع في خلال ساعات وتسل واحد تاني بعيدها ب 24 ساعه مثلا اكثر تفاصيل وواحد كمان بعديها ب 3 ايام عن حجم التغير اللي حصل. طيب مش ده هيتطلب منك شغل 24/7؟ اه معظم ال Marketing Agencies بيكون عنده 2 او 3 شيفتات للعملاء المهمين. متخليش حد يستهبل عليك ويقلك معلش اشتغلي 12 ساعة او اكثر. انا عارف انه ساعات الشغل بيكون صعب وانه تلاقي شغل بيكون تحدي. بس خليك عارف انه ده مش الطبيعي ومش صح انه يكون طبيعي.

طيب تقارير بالسرعه دي وبالحجم ده، مش هاحتاج اداة تساعدني؟

وجود اداة هيكون شيء مهم جدا فعلا لكن مش Deal Breaker. يعني مثلا ممكن تستخدم عادي TweetDeck او BuzzSumo ويديلك معلومات كثيره بفلوس قليلة. لكن لو عايز تروح لمرحلة الوحش، ساعتها هتبقى محتاج ادوات مراقبة اقوى بتجيبلك من كل حتة متاحة زي Crowd Analyzer, Meltwater, Synthesio, Talkwalker, etc.

لو مماعكش يبقى خلي في البدايل اللي قلتها في الاول فلوسها مش كثيره قوي. مثلا Tweetdeck ببلاش حتى الان. BuzzSumo بحوالي $80 في السنه يعني حوالي 1300 جنيه في الشهر اقل خطة فيه. ممكن كمان Notify.ly وفيه خطة ببلاش وممكن تستخدم Upgrade ومش مكلف. ولو ملكش في ده كله يبقى اتعلم بقى :). ولو مش عايز تتعلم هتخسر اه بس لسه ممكن تعمل التقرير انه تروح تستخدم Native Search في كل بلاتفورم انت عايزها بس ده هيعتمد على سرعة تسليم التقرير وحجمه زي ما اتفقنا.

ايه نوع المعلومات بقى اللي المفروض تقرير علاقات عامة يحتويه؟

دلوقتي خلينا متفقين انه خلاص استقريت على الحاجات اللي قلناه فوق:

  • مين هيقرا التقرير؟
  • هو عايز المده ايه؟
  • هو فعلا عايزه ليه؟
  • عايز يشوفه امتى وازاي؟

لو عملنا كده يبقى دلوقتي نقدر نحدد بقى نوع المعلومات اللي يتناسب مع حجم التقرير ومن خلال النوع نقدر نديله حجم المعلومات برضه اللي يتناسب مع الاسئلة اللي فوق.

ومن هنا خليني ارشحلك ممكن يكون ايه نوع المعلومات:

1- حجم البيانات الموجوده اونلاين عن الموضوع

ودي خطوة مبدأية. اللي بيقرا بيكون عايز يعرف هل في زيادة او نقصان في حجم البيانات عن العادي او المتوسط ولو تقدر طبعا تديله معلومات عن كام بالظبط، يبقى اعمل كده.

2- نوع المشاعر والمواضيع

هل الناس مبسوطه؟ عمر الناس ما كانت مبسوطه 😀

في بعض الصناعات لما يبقى مؤئر السعاده مثلا عندها سلبي مش سلبي جدا او محايد مش سلبي جدا فده يعتبر ليها انتصار وخاصة صناعات Telecommunication مثلا لان الطبيعي محدش هيتكلم الا اذا في مشكلة مش زي صناعات ال الاكل اللي ممكن حد يبعت قد ايه هو مبسوط من المحل.

طيب اعمل ايه لو معنديش اداة تقدر تحلل المحتويات او تحط مواضيع بصورة اوتوماتيكيه؟

ساعتها انصحك تستخدم اداة زي http://www.raosoft.com/samplesize.html علشان تحدد بيها Sample تاخدها من الشريحة اللي بتراقبها ومنها تقول يا جماعه مثلا انا اخدت X محتويات بMoE X% و Confidence Level X.

3- المقارانات

حاجه هتساعدك جدا في التقرير بتاعك هو انك تحتفظ ب Record لكل حاجه قيمة ومن على اساه تقدر انك تعمل مقارنه بين الوضع الحالي والسابق.

طبعا لازم توحد المدة الزمنيه, يعني مثلا يوم بيوم او اسبوع باسبوع او 3شهور ب 3شهور. قارن دايما Apples with Apples والا الصقر هيفضل دايما فاكر نفسه وحش علشان مش قادر يسبح.

4- المصادر

لو قدرت، اعمل المصادر اللي جبت منها البيانات بتاعتك. يعني مثلا ممكن تعملها بالطريقه دي:

Online:

  • Social Networks such as Facebook, Instagram, Snapchat, YouTube, etc.
  • News websites.
  • Forums.
  • Blogs.
  • Reviews.
  • Podcasts.

Offline:

  • Magazines.
  • Newspapers.
  • TV.
  • Radio.

لو انت معنديش الادوات اللي تقدر اصلا تجيب بيها معلومات 360 يبقى حاول على قد ما تقدر تكون واضح في المصادر اللي انت بتجيبها.


اتمنى ليك النجاح وانك ان شاء الله تعمل حاجات مذهلة. اتمنى ليكم انكم تكونوا قريبين من ربنا واهدافك كلها تحقق ان شاء الله. انت شخص رائع مختليش حد يحبطك. انت احسن بكثير مما تتخيل.

تحياتي ليك،

محمد الشريف


محمد الشريف

انا محب للناس واتمنى ان نجد الارض مليئة بالخير والمحبة بين مخلوقات الله دائما وابدا. انا شخصية تستمد قوتها من الاشخاص واقدم دائما الافضل وانا اعمل معهم. احب متابعة الانيميشن الياباني وكل ما يتعلق ايضا بسرد القصص من البيانات. احب القدرة على توصيل المعلومات الصعبة بكل سهولة للجميع. احاول زيادة المحتوى العربي القيم ولست متخصص في اللغه العربية. لذلك اتمنى ان تجد ما اقدمه مفيدا لك في حياتك المهنية والعامة.

التعليقات

التعليقات مغلقة.

%d مدونون معجبون بهذه: