أ . ب . التسويق للمؤتمرات و الندوات

في المقاله دي بحاول اني انقلك معلومات عن تسويق الندوات والمؤتمرات سواء انت اللي بتعملها او بترعاها. ان شاء الله هتكون عندك معلومات تخليك توصل لأقصى استفادة وكمان بعض النصائح وأفضل الطرق التسويقية. اتمنى ليكم معلومات شيقة ورحلة علمية ممتعه.

“By failing to prepare, you are preparing to fail. – عند فشلك ان تستعد، انت تستعد للفشل”
Benjamin Franklin – بنجامن فرنكلن

السؤال الأول: ليه محتاج خطة واضحة لتسويق المؤتمرات؟

طيب دلوقتي انت اصلا بتعمل خطة تسويقية وشغال زي الفل ايه اللي يخليك تعمل خطة لتسويق الندوات بتاعتك؟ بص الموضوع بسيط. اي شركة او مؤسسة بتحاول انها تظهر شغلها. مثلا مؤسسة غير هادفة للربح زي مرسال بتحاول تظهر للناس انشطتها وانه فلوسهم فعلا بتروح لمكان سليم. شكة زي ريد بول بتستقطب الشباب علشان يشوفوا عروضها في كل مكان او حتى انت لما تكون عامل ندوة اونلاين والناس تحضر ببلاش. انك تحط استراتيجية واضحة لتسويق الندوات او المعارض دي اصبح ضرورة قصوة انه يكون في الاجندة بتاعتك لان ممكن اني مش تعجبني الشركة او مش اكون سمعت عنها حاجه بس احب جدا الندوة بتاعتك او العرض اللي هتعمله فيخليني بالتبعيه، اهتم بيك اكتر.

ايه اللي ممكن يحصل لما اهتم بيك اكثر؟ بكل بساطه Lead Generation يعني بتخليني عميل محتمل وبيرفع في قدر العلاقه ما بينا ممكن اكون كنت Suspect هابقى Prospect او Prospect وهابقى Customer وهكذا لحد ما نوصل ل Loyal Customers/Users. لو حابب تعرف اكتر ايه اللي بحكيه ده ممكن تبص هنا:

https://www.marketing91.com/customer-loyalty-ladder/

الندوات ممكن تجيبلك جمهور كبير جدا يحب البراند بتاعك بالرغم انك متكلمتش عنه. ده ملحوظ جدا في Red Bull والعروض اللي بيعملوها سواء Sound-clash او Car Drift وغيرها. صحيح هما مش بيقولوا ليك اشرب ريد بول لكن كل حاجه بيعملوها تتماشى مع البراند. كل حاجه فيها اللوجو بتاعهم وكل العروض بتقول نفس اللي الشركة بتقوله، طلع اللي جواك! اتحرك! كلها طاقة!

http://www.sportsonearth.com/article/61581268/the-competitors-at-the-red-bull-flugtag-competition-purport-to-build-homemade-flying-machines

السؤال الثاني: ايه انواع الندوات اللي ممكن اعملها؟

احد اشهر واسهل الطرق هي انك تعمل ندوات عبر الإنترنت المشهورة ب Webinars. انت مكن تعملها بطريق كثيرة نقاشية مفتوحه للجميع، او للعرض فقط يسمعوا بس مش يعرفوا يشتركوا. عادة الندوات دي بتكون كحد اقصى ساعة واحده فقط. انا افضل دايما تسجيلها وكنت بستخدم بكثرة YouTube Live لانه كان بيسجلها على طول ويرفعها على القناة بتاعتي اوتوماتكلي. لو حابب تشوف ندوات قبل كده عملتها ممكن تشوفها هنا:

https://www.facebook.com/MohamedElsherif/events

لو مش هتعمل الايفينت اونلاين يبقى انت حابب تختار الحدث الاصعب الا وهو انك تعملها في مكان فعلي. ممكن تعمل حاجات كتيره زي مثلا انك تنظم لكل اللي على الصفحة فطار او غدا جماعي يتقابلوا في مكان مناسب للجميع وميولهم. او مثلا تعمل مؤتمر عمل وتخليهم يحضروا وتكون ليهم الاولية عن غيرهم. وده بيكون صعب لانه بيحتاج غير القدرة التسويقية، قدرة تنظيمية عالية. علشان كده انا بنصحك لو هتعمل ايفينت خلي بالك من الحاجات دي:

شاركهم اهداف المؤتمر من الاول. انه ميحضرش مؤتمر هو مش مهتم بيه احسن من انه يحضر مؤتمر وبعدين يكتشف انه ضيع وقته.
خلي دايما الموضوع اكبر من مجرد كونه مؤتمر. لما كنت بسوق الندوة اونلاين عن إدمان المواقع الإباحية، ممكن تشوفها هنا، https://www.facebook.com/events/593674437411005/ الناس كانت عندها مقاومة انها تحضر. لكن الفكرة اللي سوقتها هو صراع العلم الحديث مع الافكار الرجعية. ازاي تحمي اولادك؟ ازاي تحمي اولاد اللي بتحبهم زي اولاد اختك او اخوك؟
انت بتكلم مين؟ ده سؤال مهم جدا. لازم تكون فاهم انت عامل الندوة دي لمين وهو عايز ايه وعايزك تكلمه ازاي وعايز ياخدها امتى وفين ومحتاج بعد الندوة ايه. كل شريحة انت بتختارها هتأثر جدا على طريقة ووقت وعرض التسويق بتاعك. مثلا. تعمل فييو طويل ولا سريع؟ فيديو اصلا ولا لايف؟ صورة ولا GIF؟ مضحك ولا جدي وعملي؟ كل ده بيتحدد حسب الجمهور او الجماهير اللي حابب توصلها لانه ممكن يكون اكثر من جمهور مستهدف لنفس الندوة. زي مثلا الاب والابن.
لو عملت تسجيل قبل الندوة يعني الناس تملا استبيان او Form علشان يسجلوا. فشوف طريقة تتأكد من اللي حضر ومين اللي محضرش علشان تعرف تتابع معاهم وتبعتلهم الفيديوهات لو محضروش او تكافأ اللي حضروا.
متنساش!! متنساش!! انت هتقيس نجاح او فشل الندوة بايه؟ الناس اللي حضرت؟ اللي اشترت؟ اللي تفاعلت؟ اللي دخلت الموقع؟؟ لازم تحدد المعايير دي قبل ما تبدا رحلتك التسويقية.

السؤال الثالث: استخدم انهي أداة؟

ممكن تستخدم GoToWebinar أو GoToMeetings لان الاثنين بيوفروا خاصية الندوات اونلاين. GoToWebinar عنده القدرة لتنظيم الندوة ببعدد ضخم جدأ ممكن يصل الى 3000 الاف شخص. بس طبعا مش ببلاش يعمل حوالي 420 دولار امريكي في السنة. GoToMeeting يعتبر الاخ الصغير وده بيكون لحوالي 25 شخص بيتعاونوا مع بعض في اي ندوة. فكر فيها زي ماسنجير كده. ممكن تشوف اكتر الأدوات دي:

السؤال الرابع: طيب ازاي ابدأ اسوق ليه؟

كل ما بدأت الخطة بدري وكنت مستعد، كل ما هيكون عندك حضور افضل. كل ما كان الحدث كبير كل ما كنت محتاج تمهد ليه بصور افضل وهنا ممكن تدخل اقسام مهمة في التسويق زي العلاقات العامة Public Relation لانهم بيعملوا Press Releases بيحضروا فيها الدنيا. ممن تبدأ كمان حملات Email Marketing علشان تبعت ايميلات مصممة للمستخدمين بتوعك او لكل حد حسب اهتمامه مش لازم تبعت نفس الصيغه للناس كلها. ومن هنا ارجع للنقطة اللي وضحتها بسرعه فوق، لازم تعرف كويس جدا انت بتكلم مين وعندك كام حد عايز توصله الندوه دي. كل ما الاشخاص اختلفت كل ما قيمة الندوة لازم توصل بشكل ووقت وطريقة مختلفة. فأول حاجه هتعملها في التسويق: قسم الجمهور اللي عاوز توصله صح.

احد اكبر الخدع اللي بسمعها من الشركات هي انه “محدش بيفتح ايميلاته”. ده هزار! مفيش حاجه امسها كده الأجيال الجديده كلها الايميل جزء مهم جدا من حياتها. وبعدين بيعتمد برضه انت بتسوق لمين صحيح لكن مظنش انك بتسوق لايفينت وخاصة اونلاين ولسه محدش بيفتح ايميلاته. ممكن تعمل في خطة التسويق بتاعتك Action Plan انك تبعت ايميل قبليها بشهر بتعمل دعايه للموضوع. قبليها باسبوعين بتفكر الناس بالموضوع. قبليها بيوم للناس اللي اشتركت بتفكرها. وبعديها بيوم علشان التسجيل. طبعا الكلام ده مش هيكون بس على الايميل. لكن حبيت ابدا بيه لانه كنز مهمل مش عارف ليه.

كل الحسابات بتاعتك على السوشيال ميديا هيكون بينا وبين بعض Synergy يعني هنبعت ننبه عن الندوة حسب كل شبكة. مثلا تويتر. مينفعش انك تبعت تويته واحد قبليها ب شهر زي الايميلات. لأ انت هتجهز سلسلة تغريدات وكل واحده بيكون فيها Event Selling Point او بمعنى آخر Event Selection Criteria االي تخليني احضر ليك ومعملش اي حاجه تانيه في وقتي. ساعتها هاتدخل معاك حسابات الناس اللي هتكون في الايفينت وممكن تعمل هاشتاج بالايفينت وتبدأ تراقبه علشان لو حد استخدمه. متنساش قبل او وقت الايفينت انك تعمل ريتويت لكل حد بيستخدم الهاشتاج لو كان مفيد ليك وكمان شجع الموظفين عندك انهم يعملوا ريتويت للتغريدات المهمة. موظفينك هم اغلى عملاء عندك. تخيل معايا انه الحاجات اللي بتبعتها، كلهم بيتفاعلوا معاك.

الجميل جدا في الفيسبوك هو انك ممكن تعمل Event وكل حاجه بتبعتها على الايفينت مش بتأثر على المحتويات اللي بتبعتها على صفحتك. فانت صفحتك لسه ماشيه على الخطة اللي حاططها وصفحة الايفينت شغاله بمحتوياتها. حاجة جميله كمان هي انه الناس كلها ممكن تعمل Invite لاصحابهم يحضروا الايفينت حتى لو مش عاملين ليك لايك. وده فيديو لقيته حد بيشرح بصورة ظريفه شوية نصايح للايفينت على الفيسبوك:

https://www.youtube.com/watch?v=4GqZUit1kqo

نصائحة عامة للايفنتات الاونلاين

الناس اذكى مما تتخيل. اعمل ايفينت تفيد بيه الناس مش علشان تبيع بيه. لو الناس استفادت هتشتري.
جرب كل حاجه مره قبل الايفينت. الصوت الكاميرا العرض وغيره.
خلي عندك خطة واضحه للمحتويات وعددها لكل شبكة تواصل.
اعرف هتعمل ايه وقت الايفينت وهترد على الناس ازاي قبل الايفينت مش تجرب وقتها.
جهز هتبعت ايه للناس اللي حضرت او محضرتش.

اتمنى يكون اللي كتبته ده مفيد ليك وانك تكون استمتعت بيه. ممكن تشارك المقاله دي مع اصحابك لو متوقع انهم هيستفيدوا منها. اتمنى لكم انكم تكونوا سعداء مع الله ومع انفسكم ومع اللي انتم مهتمين بيهم.