محمد الشريف

باحث ومحلل لبيانات مواقع الاعلام الاجتماعي

في البيانات – العين بتعشق قبل العقل

عرض البيانات

الوظيفة اللي تتوفر لدينا في الشركة في قسم الأبحاث اسمها Social Media Research Analyst وخلي بالك هنا لاني اتفق مع المسمى تماما لانه ليس Data Analyst وليس Data Scientists وفيه اختلاف كبير جدا ما بينهم. في وقت محلل البيانات بيكون عنده القدرة على التعامل مع البيانات الضخمه بصورة محترفة وبيكون الداتا ساينتست عنده القدرة على تطوير لوجارتميات البيانات وتحسين فهم البيانات في المستقبل، محلل الأبحاث هدفه هو الاجابه على الأسئلة بكل الطرق المتاحه. بيستخدم كل ما يمكنه من طرق لتحليل البيانات والتقنيات والصور والبيانات الأولية والثانوية بهدف واحد فقط. الإجابة على الأسئلة البحثية بصورة سليمه وفعاله تساعد الجمهور انه ياخد قرار اكثر اطلاعا وحكمه. علشان كده جزء ضخم جدا بعد عملية التحليل والبحث بيكون خطير جدا وهو تصوير وإظهار البيانات بصورة بسيطه وسهله تساعدهم على فهم كل المجهود اللي تم بذله.

في المقالة دي، هنوضح أهمية وجود مهارة التصميم وعرض البيانات لكل باحث وإزاي وجود المهارة دي هيرفع من كفائة المعلومات اللي بتشاركها.

مش كل حاجه مهمة

في مقالة سابقة انا وضحت اليكم انه ازاي ممكن تحول رسمه من شكل الى شكل اخر اكثر جمالا عن طريق انك تلغي حاجات كتيره.

انا هنا حابب اركز تاني على النقطه دي بس المره دي بدل ما تمسح عايز تثير عين اللي بيقرا البيانات انه يلتفت بس لجزء محدد. ازاي؟ على سبيل المثال:

البولد والإيتلاك

لما تكون بتكلم عن حاجه وعايزه ياخد باله منها تقوم عامل بولد في وسط الكلام. حاجه تانيه انا بعملها علشان نميز اسامي الهيائات والشركات او المؤتمرات من الاسامي العادي هو اننا بتعملها ايتاليك Italic بنقول مثلا: قامت شركة مايكروسوفت بعرض مؤتمر الحوسبة الاكترونية اونلاين يوم الاحد. وده طبعا بيكون اقل تركيزا من البولد لكن بيكون مميز عن العادي.

الألوان

انا هاشرح الألوان بالتفصيل لان هنا بيكون عند القدرة على تغير مفاهيم كتيره جدا في عرض البيانات وخاصة الرسومات البيانية. بتقدر تجذب الانتباه لشكل محدد او عنصر واحد بس وتغير فكرة الرسمة تماما. لو البولد والاتيلاك بيكون مناسب جدا في الكتابه. الألوان بتكون رائعه في الرسومات.

لو انت بتحب تقرا اكتر. ممكن تحب تقرا المقالة دي: Selecting Semantically-Resonant Colors for Data Visualization اللي كتبها Sharon Lin وآخرون. المقاله دي انتشرت في Computer Graphics Forum واخدت Best Paper Award. بتحكي انه ازاي عملوا خوارزمية للاختيار التلقائي للألوان علشان عملية عرض البيانات تكون سهله وبسيطه جدا للي بيقراها. مثلا لما تيجي تتكلم عن المحيطات تحط اللون الأزرق او الوردي للحب. والدراسه دي اثبتت انه فعلا بوجود علاقه في الألوان ده بيحسن السرعة في فهم البيانات.

http://vis.stanford.edu/papers/semantically-resonant-colors

تعال ناخد المثال التالي:

هنا عايزين وضح عدد القطع اللي بنبيعها بالملايين لكل فرع عل مدار الأربع سنوات اللي فاتت. انت المفروض دلوقتي لو كنت قريت مقالاتي السابقة تقدر تحسن من شكل الرسمه دي علشان تبقى كده:

دلوقتي انا بركز على نقطه مهمه جدا الا وهي لكل فرع انا بدأت بكام ووصلت لكام. كده عينيك هتتجاهل الأرقام اللي في النص وده ممكن يكون مناسب جدا ليك لانه مش هو القصة اللي حابب توصلها. وفي نفس الوقت غيرت الألوان علاشن عينك تكون مدركو القديم فاتح والجديد غامق. لكن هل ممكن نحسن الرسمة دي اكتر؟

انت كده عندك القدرة انك تشوف مش بس الفرع بدأ ازاي وانتهى ازاي لأ كمان في آخر سنه مين احسن فرع وايه كان وضعه في الأول. لكن هل انت مهتم فعلا بكل الفروع؟ مش ممكن تحب دلوقتي مثلا توضح التطور الرهيب في فرع ب؟ اللي كان اوحش فرع في 2015. او مثلا توضح ازاي فرع ث فضل رقم واحد؟

اظنك فهمت دلوقتي انا قصدي ايه باستخدام الألوان لتوضيح معاني كثيره جوا الرسمه وإزاي ان تفكير كمصمم ومهارتك في التصميم هتسهل عرض كثير جدا من البيانات للمستخدمين.

الجمال وسهولة الاستخدام

ممكن انت متعرفش لكن انا دراستي للماجستير كانت في جامعة يورك في بريطانيا وكانت عن التقنيات التفاعليه.

University of York

كان جزء ضخم منها هو الأبحاث العملية التي تؤكد النظريات مش مجرد ارآء شخصية. علشان كده بحاول دائما اني اوضحلك اللي بشاركه معاك مش رأي الشخصي فقط. لأ، ده العديد من الباحثين والدارسين والكتب مش مجرد اتباع لنظرياتي انا. مثلا عندنا الدراسه اللي عملها اندرياس ودرست هذه المقالة آثار جماليات المنتج على العديد من النتائج في اختبارات سهولة الاستخدام. بكل بساطه طلبوا من 60 مراهقًا (14-17 عامًا) إانهم يعملوا شوية حاجات على الموبايل لكن على اثنين من الموبايلات مختلفة في العرض والشكل ومتطابقين تماما في كل المهام اللي ممكن تعملها. واحد شكل التطبيقات حلو والتاني وحش. لقوا ايه بقى؟ كل المشتركين اللي استخدموا الهاتف صاحب التصميم الجميل للتطبيقات قالوا انها سهله جدا في الاستخدام وفيها مهام ممتازه عن الموبايل التاني الغير جذاب. بالرغم ان الاتنين بيعملوا نفس الحاجات لكن الموبايل اللي تطبيقاته شكله احلى كان اسرع واحسن بالنسبه ليهم.

https://core.ac.uk/download/pdf/20657390.pdf

في الحقيقه مش بس كده. في كمان احد اكثر روعه كتابة في الموضوع ده مارك هزنهال في مقالته عن “The Interplay of Beauty, Goodness, and Usability in Interactive Products” عمل دراسه للعلاقه بين الفائدة والجمال لأشكال مختلفة لمشغلات MP3. وغيرهم كثير من الدراسات.

http://citeseerx.ist.psu.edu/viewdoc/download?doi=10.1.1.318.7694&rep=rep1&type=pdf

انا هدفي واضح جدا في النقطه دي وهو

ما يراه الناس جميلا، يعتقدوا انه مفيد. 

علشان كده رسمه بسيطه وجميله ممكن الناس تشوفها مفيده اكثر من رسمه عظيمه معقدة وبشعه. إذا الرسمة مش واضحه استخدم مربعات واسهم بطريقة بسيطه واشرح فيها انت عايز تقول ايه ساعدهم انهم يشوفوا مدى بساطه الرسمة.


أتمنى تكونوا استمتعتم في المقاله دي. لو عجبتكم شاركوها مع اصحابكم اللي في المجال وقولي في التعليقات انتم رايكم ايه؟


محمد الشريف

انا محب للناس واتمنى ان نجد الارض مليئة بالخير والمحبة بين مخلوقات الله دائما وابدا. انا شخصية تستمد قوتها من الاشخاص واقدم دائما الافضل وانا اعمل معهم. احب متابعة الانيميشن الياباني وكل ما يتعلق ايضا بسرد القصص من البيانات. احب القدرة على توصيل المعلومات الصعبة بكل سهولة للجميع. احاول زيادة المحتوى العربي القيم ولست متخصص في اللغه العربية. لذلك اتمنى ان تجد ما اقدمه مفيدا لك في حياتك المهنية والعامة.